Прэзыдэнт Грузіі Міхаіл Саакашвілі ў інтэрвію нямецкай газэце «Bild» паведаміў, што пад абаронай расейскіх войскаў апалчэнцы нападалі на грузінскія вёскі, займаліся вымагальніцтвам і марадзёрствам.

- Спадар прэзыдэнт, Расея прызнала незалежнасьць двух мяцежных грузінскіх правінцый, Абхазіі і Паўднёвай Асэтыі. Супраціў магчымы?

- Не, калі ваеннымі сродкамі, то ў нас няма ніякіх шанцаў. Расея самавольна і сілавым шляхам зьмяняе межы Эўропы. Калі Эўропа з гэтым зьмірыцца, у далейшым Расея паспрабуе паўтарыць гэта.

- У ноч на 8 жніўня пачалася вайна паміж Грузіяй і Расеяй. І сусьветная грамадзкасьць усё яшчэ задаецца пытаньнем, хто яе пачаў.

- Ня мы. Расея, рыхтуючыся да ўварваньня, месяцамі сьцягвала войскі да нашых межаў. Той ноччу артылерыя некалькі гадзін абстрэльвала нашы войскі. Мы выконвалі перамір'е. Толькі калі рускія танкі ўвайшлі ў Паўднёвую Асэтыю, мы задзейнічалі артылерыю.

- І пры гэтым Цхінвалі, сталіца Паўднёвай Асэтыі, апынулася амаль цалкам разбуранай.

- Гэта не адпавядае рэчаіснасьці. З высокадакладных ізраільскіх артылерыйскіх прылад мы абстрэльвалі будынак ураду і некаторыя пазыцыі сэпаратыстаў. Затым грузінскія войскі ўвайшлі ў горад. Пасьля гэтага рускія ўстроілі дывановае бамбаваньне Цхінвалі. У нас проста няма зброі, здольнай нанесьці такія разбурэньні. 80% зь іх на сумленьні рускіх.

- Чаму перад ужываньнем артылерыі вы не праінфармавалі НАТА?

- Таму што я ніколі ня думаў, што баявыя дзеяньні прымуць падобны размах. Калі мне паведамілі аб рускіх танках у нашай мяжы, я патэлефанаваў нашаму міністру абароны, які знаходзіўся ў водпуску ў Марбэлье. Ён сказаў, каб я не паддаваўся паніцы. Праз дзень ён вярнуўся. Але толькі пасьля таго, як я накрычаў на яго ў тэлефон: "Вяртайся хутчэй!"

- Ці чакалі вы ўмяшаньня НАТА?

- Я ніколі не разьлічваў на тое, што НАТА пашле свае войскі. Але мне хацелася, каб на дапушчальную мяжу яно паказала Расеі раней.

- Вы задаволеныя рэакцыяй канцлера Меркель на крызіс?

- Яна выказалася вельмі ясна і знайшла цьвёрдыя словы ў адрас Расеі. Яна ведае, якія рускія. Бо яна жыла сярод іх. Ёй вядома, што хлусьня для іх – гэты нармалёвы сродак камунікацыі і што яны могуць быць вельмі жорсткімі.

- 1 верасьня ў Брусэлі адбудзецца саміт ЭС, прысьвечаны каўказскаму крызісу. Вы прыедзеце?

- Не, калі я пакіну Грузію, рускія перакрыюць нашу паветраную прастору і перашкодзяць майму вяртаньню ў краіну. Аднак я чакаю ад гэтага саміту адназначнага выказваньня ЭС, што ён і далей будзе стаяць на боку Грузіі. Тое ж самае датычыцца нашага чалецтва ў НАТА.

- Ці зьдзейснілі рускія вайскоўцы злачынствы?

- Так, пад абаронай расейскіх войскаў апалчэнцы нападалі на грузінскія вёскі, займаліся вымагальніцтвам і марадзёрствам. У нас ёсць паведамленьні аб катаваньнях і масавых згвалтаваньнях. Гавораць, што людзей хавалі жыўцом.

- Расейскія ўлады вінавацяць у ваенных злачынствах грузінскія войскі.

– Гэтага яны ніколі не змогуць даказаць, у гэтым я ўпэўнены.

- Ці быў нейкі момант, калі вы моцна спалохаліся?

- Я вельмі нэрваваўся. І нярвуюся дагэтуль. Але страху не было. У нейкі момант я сказаў свайму ўраду: "Рускія ідуць на Тбілісі. Калі жадаеце, можаце зьяжджаць". Але ўсё засталіся. Мы не баімся.