Напярэдадні святочнай школьнай лінейкі лідскія актывісты БУНТ'у правялі акцыю супраць новаўвядзеннняў у сістэму сярэдняй адукацыі.

Каля лідскіх школаў з'явіліся графіці "Рэформа адукацыі - здзек з моладзі!", "Хачу ва ўніверсітэт, а не на завод!", "Не - падвойнаму выпуску!" і іншыя.

Улады хутка прарэагавалі на дзеянні моладзі - на раніцу бальшыня надпісаў была спешна замаляваная фарбаю. Таму актывісты паўтарылі акцыю графіці ў ноч на 1-га верасня. На гэты раз іх чакалі міліцыянты. Адна дзяўчына была затрыманая без складання пратакола.

Як вядома, ад гэтага навучальнага году ўступае ў сілу новы закон датычна сістэмы сярэдняй адукацыі. Беларуская школа вяртаецца да 11-гадовага навучання. Значна скарачаецца колькасць гадзінаў для вывучэння гуманітарных дысцыплін – гісторыі Беларусі, беларускай і замежных моваў, адмяняецца профільнае навучанне. У выніку ў школе стануць непатрэбнымі 10 тысяч настаўнікаў. На дадзены момант адсутнічаюць падручнікі з новымі праграмамі. Школьнікі, якія навучаліся паводле 12-гадовай праграмы і сёлета скончылі 10 класаў, змушаныя будуць за год прайсці праграму двух гадоў і наступным летам паступаць ва ўніверсітэт разам з тымі, хто скончыў школу яшчэ па 12-ці гадовай сістэме. Адпаведна, конкурс у ВНУ будзе вельмі высокім.

Бальшыня школьнікаў і іх бацькоў супраць новай рэформы. Аднак уладам, як заўжды, пляваць на меркаванне сваіх грамадзянаў.